زياد البصراوي
عله سوالف كَــمرته ايغمض ألليل
وعله صــوت الـــنده تفز البساتين
عدنه جروح ماتحمل بـــعد ضيم خطية
جروحنة وصلفة السجاجين
جرعناهن صبر من طكَـــــــة الطوب
لحد مـــا حدبت بينة الحياطين
وجبناهن سحــل بجفوف شعلان
ولهسه بروسهن لون النياشين
ليغرك صــديج النــاعم أيصــــير
زنجــار الفشــكَ يعمــي الشواجيـر
أباب الخوف ظلت بس الاحلام
وعلــــــه حياطنة خرسة التصاوير
شلنه حروفنة بتابوت الأقلام
وكَمنه نكَول خانتنه التعابير
القلم صح من خشب بس يكتب أفكار
ما يكتب جرح سن المناشير
أذا شح مايهه تموت البساتين
وتفك حلوكَهه اعليهه السواطير
إذا كَصة النهر ما تحمل الماي
النهر بي صوج شعليهه النواعير
وأذا مات الشجر ماينطي الفياي
ويظلّ سالوفة بحلوكَ التنانير
عله كَلب السمه لا تشمر حجـار
الطيور بلا سمه ما تعرف تطير
اليشم خد الورد خل يقره آيات
الورد قرآن ما يحتـــاج تفسير
الغصن ماله ذنب لو حولوه فاس
الغصن مخلوق لبيوت العصافير
